Сказание о милости Божий и о создании храма во имя Господа Бога и Спаса нашего Иисуса Христа от смертоносныя язвы. 

Всякия нужды человеческия есть виновно грехопадение наше. Егда не бяше грех, не родися нужда, не бяше треб Адаму орати, сеяти и жати, донележе не преступил есть заповеди творца своего. Сама бо земля угодный плод свой ко препитанию даяше Адаму, не бяше нужда, еже пещися о одежди или покровения ради наготы и срама плоти, или во украшение ея. Чужда бо нагость всякия срамоты бяше, и красота естественная доволно лепотне сияше, и хладни ветры плоти досады не творяху. Вся стихиа и вся тварь учреждению человеческому работаше, и ни едино противство содеяти можаше. А внегда преступи заповедь Господню Евы ради Адаму, и нагость срамом облечеся, еже требовати ей смоковнаго листвия ко покровению, и красота доброты своея лишися, и земля, кроме трудов, не восхоте даяти нужнаго препитания Адаму, и речено бысть ему: «В поте лица своего снеси хлеб твой». Аще тако праведно бысть со Адамом за едино преступление, кольми паче скорбей, и бед и казней мы заслужихом безчисленным умножением прегрешений наших. Откуду родишася в мире брани, глади, и губительства? Ей, мати есть тех бед грехопадение наше. Согреши бо царствующий пророк Богу, егда повеле сочислити всего множество Израиля, и се вниде Гад к Давиду, пророк к пророку и исповеда ему, глаголя: «Избери сам себе быти что хощеши: приидут три лета глад на землю твою, или три месяцы бегати пред враги твоими, и будут гоняше тя, или три дни смерти в земли твоей быти. Ныне убо разумей и виждь, что отвещаю пославшему мя?» Разсудив же Давид избра себе впасти в руце Бога жива и терпети смерть во Израили. Но коль люта и жестока та бяше смерть, страх объемлет и воспомянути: ибо от утра до часа обедняго умроша людей господних седмьдесят тысящь 1. 
Согреши Ахав царь и весь негли с ним Израиль, и се, ревнуя пророк Илиа по Бозе, заключи небо на три лета и шесть месяц. Не даде росы и дождя ни мало, небо не дождит, а земля плодов не растит, небо затверде яко медь, а земля ожесте яко камень. Облаки росы не испущают, а злак земли изсыхает, воздух ясным ведром блистает, а нивы от сухости чернеют. Ведро, еже прежде благодать бываше, казнь всем живущим на земле тогда являше. Плачутся люди и скоти рыдают, лютая зело скудость человеком, якоже многим изчезати от глада 2. 
Сия толь великия беды грех ради наших многих попущены бывают. Посылает Бог, судия праведный, мечь острый на люди за умножение беззаконий. И за что разгневася всея твари Господь, наведе потоп на вселенную, и погуби всяко животно, разве ковчегом спасенных? За умножение же согрешений рода человеча, яко же и Апостол глаголет: «Открывается бо гнев Божий с небесе на всяко нечестие и неправды человеческия». Такоже и гласом Иеремии пророка глаголет: «Болезнию и язвою накажешися Иерусалиме». И сего ради плач великий излия, вопиет, глаголя: «По что еще язвитеся, прилагая беззакония?» 3 Сего ради Бог гневается и претит нам, понеже презираем повеления Его и заповедания, и тако прогневахом святаго Израилева. Тем же разумеем, братия, злобу и плетение, тлю и погубление, яже прияша и приемлют попущением Божиим грех ради наших, яко же бысть и в роды наша. 
В лето от создания мира 7163-го года при державе благочестивейшаго Государя Царя и Великаго Князя Алексия Михайловича всея России самодержца, и при святейшем Иосифе Патриархе Московском, и при епископе Маркелле Вологодском и Великопермском месяца септемвриа с 1-го числа бысть во граде сем и в весех, прилежащих около града, попущением Божиим грех ради наших, смертоносная язва, еже есть мор велий. Людие бо умираху незапною смертию: ходил ли кто, или стоял, или сидел, и тако забывся в мале, вскоре умираху. А инии с вечера спати ложахуся, а за утра мертвии являхуся. И изо многих домов малии и велицыи вси изомроша. И бяше видети во граде на путех и в домех мертвыя. И священицы едва успеваху мертвых погребати, и ничтоже взимаху, сребро бо и злато, и драгоценныя ризы ни во что же бяху, и никтоже бо их желаше, видяху бо вси граждане пред очима своима смерть, и бяху вси мужие и жены тюстящеся, и притекающе к церквам Божиим, и с малыми детми, молящеся Господу Богу со многими слезами о согрешений своих, чтобы утолил праведный гнев свой и помиловал люди своя. И исповедающе грехи своя, и причащахуся пречистых Тайн Христовых, и отхождаху в домы своя и милостыни многи творяху. Не бяше бо тогда видети, или слышати во граде и в весех татбы и разбоя, лжи и клеветы, гнева и ярости, и обиды, и всякия злобы, но бяше любовь велия, яко же мощно с Давидом глаголати: «Благо мне, яко смирил мя еси, да научуся оправданием Твоим». А о житейском ничтоже помышляху, видяху бо вси людие пред очима своима смерть. И никто же бо тогда на купли упражняхуся, торжище бо упразднися, разве потребных нуждных, и то малое число. Бысть же сия смертоносная язва мало по прежде сего тогожде году и в царствующем граде Москве, и во иных градех, Божиим же милосердием утолися. Привлекает бо нас Господь нуждею, егда попущает беды, скорби, гонения, глад, губительство, огнь, мечь, болезни, печали и тем подобная. Ибо и пастырь непослушливую овцу и ленивую бичем ударяет: тем же убо и пророком Давидом реченное к Богу: «Броздами и уздою челюсти их востягнеши не приближающихся к Тебе». Сего ради слышаше сия, смиримся убо под крепкую руку Божию, да не всуе тецем, и страхом и трепетом, и слезами и воздыханми умолим милосердаго и долготерпеливаго Бога, ни весма бо презрети имать милосердый надеющихся на Него, яко же сам той рече пророком: «Призови мя в день скорби твоея, и избавлю тя, и прославиши мя». Недостизаем бо призывати Бога, и благий предваряет нас милостию своею и щедротами, и дает молитву молящемуся, и облак скорби разоряет, и утешает скорбящия, и падшия возстав-ляет Господь. Никтоже себе тако милует, якоже всех нас Бог, точию ожидает всегда покаяния нашего, слез теплых, поста и молитвы. 
Токмо три дни остаяху до погубления Ниневидца, и покаявшеся проповедию Иониною людие: царь и людие облекошася во вретища, главы своя пепелом посыпаху, начата молитися со слезами, и пост тридневный всякаго возраста людем заповедаша, такожде и скоти от еды удержахуся. И Господь удержа гнев свой, и не сотвори с ними якоже прещаше 4. 
На три дни послал бяше Господь смерть лютую со оружием острым во пределы Израильтейския за грех Давидов, но егда узре Давид, яко от утра до часа обедняго седмьдесять тысящ мужей израилтелских падоша, теплую молитву со слезами пролил ко Господу, и возопи: «Аз есмь согрешивый, а не овцы, аз есмь пастырь зло сотворивый, а сии овцы, что сотвориша? Буди ныне рука Твоя на мне и на доме отца моего». И абие всемилостивый Господь услышав вопль его, повеле чрез пророка Гада Давиду олтарь себе создати и принести жертвы, еже сотворшу Давиду кроме всякаго медления, и отъят Господь язву от Израиля 5. 
Такожде и сей род граждане, видяху на всякий день наносимых множество мертвых людей, начата со слезами вопити ко Господу сердцем сокрушенным, согрешихом глаголюще: «Владыко, и исповедаем прегрешения наша беззаконновах, понеже повеления Твоя презрехом, яко милосердие Твое затворихом, яко человеколюбие Твое спрятахом беззаконии и злобами нашими, ими же пожихом. Помяни, Господи, многая щедроты Твоя, помяни, Господи, многая чудеса Твоя, и не помяни наших беззаконий первых. Но скоро да предварят ны щедроты Твоя, Господи, яко умалены нас сотворил еси. Призри с небесе от святаго жилища Твоего, и виждь и посети нас, посети виноград сей, наследие Твое, и исправи, его же насади десница Твоя, Господи». 
И такс теплыя молитвы со слезами пролияху ко Господу, а Господь велию ползу человеком зная, глаголет: «Просите и дастся вам, ищите и обрящете, толцыте и отверзется вам». Человецы убо стужения не терпят, и стужающим просителем с негодованием просимое отрицают. Господь же во стужении благоволит и стужатели любит, а просимое милостивно с приложением дарует. Не стужающия же ко стужанию увещает: «Просите и приимете, да радость ваша исполнена будет». Стужайте точию теплою молитвою Господеви, толцыте во двери милосердия Его поклонением глав ваших смиренных, не точию же за достоинство, но за и стужание наше Господь дарует что. Сего ради, братие, предварим лице Его исповеданием, поклонимся и припадем Ему, и восплачемся пред Господем сотворившим нас, яко той есть Бог наш, и услышим Его, глаголюща Исаиевым древним гласом: «Яко егда обращся воздохнеши, тогда и спасешися». Егда не может рука Господня спасти, или замедлит ухо его не услышати, но посреде прегрешения наша разлучают нас от Бога, и того ради отвратил есть лице Свое, не помиловати нас. И паки глаголет: «Измыйтеся и чисти будете, отимите лукавство от душ ваших пред очима моима, престаните от лукавствии ваших, научитися добро творити». Иоилем пророком глаголет сице: «Обратитеся ко мне от всего сердца вашего, лощением, плачем и рыданием, и аз раскаявся о злобах ваших, глаголет Господь: и сотворю по милости с вами, и помилую вас», якоже и Давид глаголет: «Близ есть Господь всем, призывающим Его во истинне. Ибо волю боящихся Его сотворит, и молитву их услышит и спасет их». 
И тако взыде на сердце гражданом, еже создати олтарь имени Господню, и сотвориша в сердцах своих обещание, еже на сем месте создати храм Господу Богу, славы ради имени Его, создати его днем и нощию неотступно, во еже бы Господь Бог утолил праведный Свой гнев и помиловал люди Своя от смертоносныя язвы. А еже в сердцах своих умыслиша, то делом без всякаго медления воздвигоша святый храм. И уставиша день, в он же бы основание его положити, и проповедаша во граде всем людем за мало дний, чтобы благочестивии людие сходилися ко уставленному дни. И известися во граде и в весех о создании храма во имя Господне, и радовахуся вси людие, ожидающе уреченнаго дни. 
Егда же прииди уставленный день в оньже бы основание его положити, и абие стекахуся вси граждане, и из волостей множество народа ко нареченному месту, ожидающе в оньже час основание его положити. И по благословению пресвященнаго Маркелла архиепископа Вологодского и Великопермскаго начата на сем месте сооружати храм древяной того же году месяца октовриа против осмаго на десять числа, на память святаго апостола и евангелиста Луки. И положиха основание его в вечере в первом часу нощи, и делающе мужественне и множество народа. Овии древне употребляху и назидаху, а инии на основание полагаху, а инии из разных мест древне возяху, не бяше бо тогда на сооружение храма в готовности ничто же, но все из разных мест приношахуся, а инии мнози, ради ношнаго мрака, береста зажигаху, и в руках своих на древесех ношаху. И бяше тогда видети велие успяние, паче же Божие промышление, якоже самая истина Христова глаголаше: «Без Мене не можете творити ничесоже». А инии благочестивии мнози при создании храма и до совершения безотступно стояху, и слезы от очию изливаху, яко сподобишася видети, яже ни отцы видеша. Ко уготовлению же храма всякое требование и древне граждане сподобляху, а работающий народи мзды не взимаху, людей же при создании храма ни единаго не вредило человека. И совершиша на утрешний день со всякою готовностию, точию стен не отесаху. Последиже вскоре исправиша, и ко уготовлению освящения с великим тщанием изготовиша. Трапезы же в то время не делаша, образы же собраша от многих приходских церквей, яже обретаются и до днесь во храме сем. И молиша граждане преосвященнаго Маркелла архиепископа прийти на освящение. Архиепископ же, велиими слезами облиявся, слышав о совершении храма, немедленно в той час подвижеся со всем освященным собором. И освятиша олтарь во имя Господа Бога и Спаса нашего Иисуса Христа, в той же день и литургию отслужиша к вечеру, и молиша Господа Бога, чтобы утолил праведный гнев Свой и помиловал люди Своя от смертоносныя язвы. И тако разыдошася вси, кийждо во своя домы, славяще Бога, яко сподобил Бог сооружити и освятити храм единем днем и нощию. Инии же благочестивии мнози молебствоваху Всемилостивому Спасу всю нощь. И умилостивися благоутробный Господь, измени смерть на живот: преста 6о от того дни в людех смертоносная язва. 
Присовокупиша же тогда тому своему возследованию. По освящении оныя единодневныя Спасовы церкви по четырех днех, еже есть октовриа в 23 день, на память святаго апостола Иакова, брата Господня по плоти, изобразиша изуграфским художеством, единым днем, на иконе образ Всемилостиваго Спаса, еже и ныне всеми видима во славу его благодавца Бога, и в воспоминание предъявленнаго чудесе и о избавлении от смертоносныя язвы. 
И оттоле уставися праздник сей праздновати милости Божий, месяца октовриа во осмый на десять день, во оный же день и создася на память святаго апостола и евангелиста Луки. И бывает хождение с честными кресты и святыми иконами со множеством народа по вся годы и до днесь неотложно. 
Темже, братие, велик» сию радость приимше в сердцах наших, возвеселимся духовно, и глас радости и веселия вещаем, яко же церковь милости наша со пророком Давидом вопиет, глаголющи: «Воспойте, Господеви, песнь нову, яко дивна сотвори Господь». И егда случится бездождие или многодождие, и о всяких иных нуждах, и тогда бывает празднество Всемилостивому Спасу, и крестное соборное хождение о милости Божий прошение, и Всемилостивый Господь являет свою милость и человеколюбие на нас. Тем же велие и преславно есть Владыки нашего человеколюбие, и никто же доволен будет на благодарение Его, не токмо бо приемлет отходящих и удаляющихся от Него, но паче возвращающихся великими дары почитает и веселит. И не токмо не ищет судити им, но и благодатем сподобляет их, воистину благ убо есть Бог ко всем, и человеколюбив и долготерпелив, изрядно же свою благость на согрешаюших показует, к праведным убо везде является, яко тяжек грешным же скор помощник есть и милостив, и подвизает их благими обеты. 
Сия ведуще, братие, никогда же да отчаемся, ниже обещания своя забудем, в злобах живуще и в неправдах. Ибо за что пострадаша прежде бывший нас людие, како праведным гневом Божиим истреблении быша во истину за своя согрешения, тем же убо помроша и наши души, слушатели любезнии, помроша грехами смертоносными. Восплачемся убо и мы смерти душ наших, негли умилостивится Христос Господь, Ему же свойственно есть миловати, и тако слезами и воздыханием умолим благосер-даго и долготерпеливаго Господа, и нравы всякими исправим себе. Полезно есть нам и чуждим наказатися бедством и исправити житие наше, претит бо и нам велика совета Ангел смертию на пути жизни сея, понеже согрешаем. 
И сего ради убоимся прещения Владычня, и сотворим плоды достойны покаяния, что самем делом совершается от начала века и доныне. Ибо первозданный всего рода человеча праотец, обратився ко Господу покаянием, многочисленными слезами прошение получи преступления своего и вечнаго свободися мучения. Праведный Ной проповедаше людем покаяние, созидая ковчег спасения ради животных, сам убо спасеся, а не покаявшейся в водах потопа изчезоша телесне и в геенне душевно. Ниневитяны тридневно покаявшеся о согрешениях своих, свободни быша от погибели Богом, а содомляне, яко пренебрегоша покаяния, огнем с небеси спадшим по всею Пентаполиею созжени, землею поглотишася. Мана-сия, по множестве нечествования, Давид, по скверном прелюбодеянии и убийстве, Петр святый, по трикратном отречении, грешница евангелская, по блудном жития нечестии, разбойник, по всем веце на убийствах и беззакониих изживший, – святым покаянием Духа благодати получиша, Бога умилостивиша и царство небесное получиша. Вси сии вся скверны грехов своих источники слез покаяния святаго омыша. Велия убо есть к Богу добродетель, покаяние святое, еже и гнев Божий прелагает на милость, и мечь, извлеченный в казнь грешником, в место его возвращает. 
Образ же покаяния прописа нам святый Иоанн Предтеча, вопия: «Сотворите плоды достойны покаяния, еже есть: оставлше грехопадения богомерская, кайтеся сокрушением сердечным, плачитеся о них горейными слезами, и благая плоды добродетелей Богу любезных злобам вашим противныя содевайте». Аще кто горд бяше, да смиряется; высокомысленный да смиренномудрствует; отчаявыйся, да стяжет надежду; соблазнивый, да назидает; сребролюбец, да щедрит нищия; любитель суеты мира сего, да возлюбит сущая небесная; скверный, чистоту да хранит; пияница, да трезвится; судия неправедный, да даст суд истинный; грабителие, чуждая имения похищающий, и тати, возвращше чуждая имения, прочее да питаются труды своими, и нищия от имений праведных да насыщаются, а иннии злобницы, такожде покаявшеся о гресех своих, да творят противная злобам своим добродетели, такожде сотворшии содеют дела покаяния достойная. Аще бо не покаемся, и не отступим от лукавства нашего и неправды, и благих не почтимся творити, погибнути имамы праведным судом и гневом Божиим. Убоимся убо, братия, и вострепещем слышаше сия, и потшимся хранити заповеди Божия, и о церквах Божиих не нерадим. Ноеви корабль повеле Господь сооружити, спасения ради, нам сам Христос Господь корабль церкви создал есть, да в ней спасение получим. 
По прешествии же доволных лет, егда она единодневная Спасова древяная церковь обетшала, умыслиша граждане, вместо древянаго храма создати каменный, во еже бы толикое Божие милосердие вечно и не забвенно было в приидущия роды. И тогда благословленном преосвященнаго Гавриила, архиепископа Вологодскаго и Белозерскаго, начаша на сем месте основание сея Спасовы каменныя церкви, в лето от создания мира седмь тысящь сто девяносто шестаго года. Иже с велиим усердием положиша начало зданию храма сего святаго, с равным прилежанием совершиша и дивным тщательством приложиша украсити, последи же с теплым рачительством печахуся, освящену быти. И в лето седмь тысящь двести шестое месяца февруариа в четвертый день освящена бысть сия святая церковь им же преосвященным Гавриилом архиепископом на память преподобнаго Исидора Пилусиотскаго, во славу всемогущаго Бога, во еже бы жертвам приноситися Ему от человек, и при них о всякой нужде теплым изливатися молитвам 6. 
Глаголет бо Господь к Соломону, создавшему сей храм пречестный сице: «Избрах место то Мне в дом и жертву. Аще заключу небо и дождь не излиет, и аще пошлю и повелю пругом пожрети землю, и аще пошлю губительства на люди Моя, и аще оскорблени будут люди Моя, на них же возвано есть имя Мое, и помолятся и взыщут лица Моего, и обратятся от путей своих строптивых, и Аз услышу от небесе и милостив буду грехом их, и исцелю землю их. И ныне очи Мои будут отверсты, и уши Мои будут послушни к молению места сего». Темже Боже всещедрый и Всемилостивый Господи, любезно приемый, храм Тебе созданный от раба Твоего царя Соломона, и по освящении его обещавыйся услышати молитвы во храме том, к Тебе проливаемый 7. 
Приими молитвы, человеколюбче Господи, яко жертву благовонную, и сей храм святый Тебе самому в честь и славу от рабов Твоих сооруженный и услыши глас моления раб Твоих, к Тебе во умилении вопиющих: како же во храме Божием достоит нам стояти? Се увещание имамы сие: в храме стояще, на небеси стояти мнися, небо бо есть церковь, занеже имать престол Божий. Яко убо на небеси никоеже есть житейских попечение, тако и в церкви да не будет, яко на небеси есть безпрестанное благохваление, тако да будет и в церкви. И тако притекайте ко Господу в дом Его молитвенный, покланяйтеся Ему со страхом, бойтеся Его, и не лишени будете всяких благих. 
Во исполнение же благолепия, украсися сия святая церковь стенным изуграфским писания изображением, лета от воплощения Слова Божия тысяща седмьсот осмаго на десять года, при державе благочестивейшаго Великаго Государя Царя и Великаго Князя Петра Алексеевича всея Великия и Белыя России самодержца, и при благороднейшем Государе Цесаревиче и Великом Князе Петре Петровиче, и при внуке его госуда-реве при благороднейшем Государе Цесаревиче и Великом Князе Петре Алексиевиче, между патриаршеством, благословением великаго господина Преосвященнаго Павла, епископа Вологодскаго и Белозерскаго, во славу его всещедраго Бога, дабы во едино множество людей собирающихся, и миром Богу молящихся действенну и непраздну прошению быти. Во церкви убо, яко в свойственном Богови дому, в оньже мнози собираются людие: овии нуждных просити, овии благодарствие возсылати, овии оставления согрешений молити, благоволи Бог жертве безкровней приношенней бывати, да яко о всех и за вся приносится. Сего ради, братие, не со тщими руками пред лице Господне приходити достоит, яко сам Господь завещает, глаголя сице: «Да не явишися предо Мною тощь». Но всяк да приходит нося с собою, елико может жертву: ов свещу, ов фимиам, ов воск, ов елей, ов просфоры, ов вино лозное, или подаяние некое на жертву в церковь и на служители ея, всяк по своей силе, а Господь и едину цату яко от вдовицы евангелския, за великий дар приимет. Аще же кто в сих подаяниих оскудевает, от таковагодовольна есть жертва Богу, дух сокрушен, от таковаго сердца сокрушенна Бог не уничижит. Сицевыми же приходяще жертвами, надеждно проливайте молитвы ко Господу, а Он яко обещание даде услышати, неизменно сохранит слово, ибо праведен Господь во всех словесех Своих и преподобен во всех делах Своих, небо и земля мимо идет, словеса же Господня не имут прейти. 
Темже убо, православные христиане, любезно и благохотне назидайте храмы Божия по градовом и селам, украшайте велелепно, ибо Господь любит любящия благолепие дому Его и исполнит вся прошения наша и возниспослет нам благодать Святаго Духа зде, а по временной жизни, егда разрешится храмина телесе нашего, даст нам внити в дом Свой небесный, и тамо учредит ны пищею пренебесною, еже есть вечным зрением лица Его пресвятаго. Темже блажени убо вси любящий Бога, и хранящий словеса Его, яко вас ради дом небесный со всеми своими уготовася добротами. Блажени вси удове церкве Христовы, яко идеже есть Христос Господь, слава ваша, тамо и вы будете во славу облечени о сицевом божестве. Радуйтеся вси, уготовляющий душы и сердца ваша во обитель Богу, яко вас ради в дому Отца небеснаго многи обители суть уготованны. Радуйтеся и вы, иже на земли храмы имени Божию созидаете, яко и ваша имена написана суть на небесех, не точию в книгах животных, но и на вратех домов ваших из небеснаго злата уготованных. И самое ваше дело имать похвалити, и за дело делом возмездием сотво-рити, за земныя храмы небесныя обители воздати. Поелику вы земныя во славу Его украшаете храмы, потолику вам Он небесныя в вечную славу вашу благоволит украсити паче со преизобилием. И создаша храм сей рукотворенный на земли, во еже бы прияти вам нерукотворенный вечный на небеси. Создаша Богу истинному обитель, да приимете едину от многих обителей Отца небеснаго, создаша во славу Божию, да сами от Него славу приимете на небеси. Поставиша трапезу святую, да сами у небесныя посаждени будете, трапезы одеяша ю и украсиша весь храм велелепотами, да сами одеяни будете одеянием брачным, и о небесней лепоте возвеселитеся, яже вся даст вам всещедрая десница Божия. 
Поучайте подручники ваша, еже неленостно и благочинно входити во храмы Божия и в них, со страхом стояще, теплы молитвы к Богу, яко кадило благовонное возсылати. А Господь всеблагоутробный добре стоящих во храме Его земных навыкшия введет во храм Свой небесный, еже вечно тамо веселитися в безконечныя веки. Аминь.