Из духовной грамоты вологодского князя Андрея Васильевича о завещании Вологды брату великому князю Ивану Васильевичу
// Старая Вологда, XII - начало XX в. : сб. док. и материалов. - Вологда : Легия, 2004.

Во имя Святыя и Живоначальныя Троица, Отца и Сына и Святаго Духа, се яз, многогрешный худыи раб божий Андреи, при своем животе, в своем смысле, пишу сию грамоту духовную, кому ми что дати и у кого ми что взяти... 
А что моя вотчина, чем мя благословил отец мои, князь велики Василеи, год княж Петровской Дмитреевича, да Вологда, и с Кубеною, и с Заозерьем, со всем, что к Вологде, и Кубене, и к Заозерью потягло, и с пошлинами, да Иледам с Обнорою, и с Комелою, и с Волочком, да Авнега, да Шиленга, да Пелшма, да Бохтюга, да Оухтюшка, да Сяма, да Тошня, да Янгосар, и со всем с тем, что к тем волостем потягло, и та моя вотчина вся господину моему, брату моему старейшему, великому князю Ивану Васильевичю, а Иледам за моею матерью, за великою княгинею, до ее живота, и та волость Иледам после матери моей, великой княгини, живота господину моему, брату моему старейшему, великому князю... 
А ко [Святей Троице в] [а] Сергиев манастырь, на поминок своему роду и свое душе, даю на Вологде из Сямские волости сорок деревень волостных к их селом к манастырским, что на Сяме, и господин мои и брат мои старейший, князь велики, велит им отвести сорок деревень волостных, которые деревни пришли к их землям к манастырским. 
А которые есми земли подавал в своей вотчине манастырем и церквем божиим, села и деревни, и господин бы мои, князь велики, пожаловал, тех моих грамот не порушил. 
А что мои манастырь Спас святы на Каменном, и которые земли того манастыря, села и деревни, в моей вотчине, моего данья и не моего данья, и господин бы, князь велики, пожаловал, тех земель манастырских спаских всех писцом писати и дани с них имати не велел. 
А что есми в своей вотчине, на Вологде, в городе, прибавил пошлин в тамзе и в ыных пошлинах, или будут мои пошлинники что прибавили пошлин, и господин бы мои, князь велики, пожаловал, учинил пошлины все по старине, как было при моем отце, при великом князи. 
А что в моих селех, на Вологде и в Торусе, на хрестианех мое серебро издельное и ростовое, и мое жито на них заемное и оброчное, и которые мои села и деревни за моими детьми боярскими с моим серебром, и яз то свое серебро и жито все отдал хрестианом. 
А что моих людей полных, и кабальных, и приказных людей, которые от меня прибытки мои ведали, те все на слободу. 
А приказываю душу свою помянути, и долг заплатити, и все розправити по своем животе господину своему, брату своему старейшему, великому князю Ивану Василье-вичю, положил есми о всем на Боз да на нем, на своем господине. 
А у сее духовные грамоты сидели: архиепископ ростовской Васьян, да Троицкий Сергиева манастыря игумен Пасеи, да отец мои духовной, поп Микита, да великого князя боярин, князь Иван Юрьевич. 
А сю грамоту духовную писал дьяк мои Василеи Ухтомской. 
ДДГ. Т. 2. М.: Л., 1950. С. 275-277.